Føreord
Frå
Hjørundfjord
er utgjeve av Hjørundfjord sogelag. Det er eit
årsskrift som kjem ut i desember kvart år.
Sogelaget ønskjer å fortelje om folkelivet
i Hjørundfjord i tidlegare tider med mål
å skape interesse for vår felles historie,
slik at ein knyter band mellom folket før og
no. Vi er også særleg opptekne av å
nå i utflytte hjørundfjordingar med årsskriftet
vårt. Hardt slit for det daglege brød på
tungdrivne småbruk var ofte den kvardagslege realitet,
men i solskin og svartestille kunne ein kvile auga og
sinnet med dei vakraste naturbilete. Årsskriftet
skal vere ein tur heim i juletida til ettertanke. Hjørundfjordingen
er stolt av røtene sine, og sogelaget ønskjer
å stimulere til heimlengt. Vona er at nye generasjonar
skal finne arbeid og livskvalitet i vår mektige
natur. Filosofen Rousseau lanserte på slutten
av 1700-talet slagordet "tilbake til naturen".
Vi ønskjer som han attendeflytting, og at ljos
atter skal lyse frå fråflytta tun. Hjørundfjorden
er den vakraste fjord!
Denne gongen er det småindustrien som er hovudtema
i årsskriftet. Rundt om i bygdene var det mange
handverkarar som starta opp med småindustri. Nokre
få dreiv relativt stort og sikra arbeidsplassar
til fleire, andre skaffa seg sjølv ei inntekt
til å føde ein familie. Nokre trong ei
biinntekt å skøyte på ein liten gard
for såleis å skaffe seg eit levebrød.
Det viste seg raskt at vi her har ei stoffmengde som
gjer det umogleg å få med alt i eitt tidsskrift.
Fleire artiklar om temaet ligg derfor ferdiggjorde på
vent til neste årsskrift.
To andre tema var det også naturleg å gje
ei meir omfattande dekning dette året. Unionsoppløysinga
i 1905 var eit nervepirrande politisk oppgjer mellom
grannar. Denne saka vekte eit sterkt nasjonalistisk
fellesskap også i Hjørundfjorden. Gunnar
Ellingsen har skrive ein artikkel om dette storhendet,
Ola Skylstad eit dikt. Tradisjonen tru har Ellingsen
også funne fram fakta frå livet elles i
Hjørundfjord kommune for hundre år sidan.
Hjørundfjord kyrkje har 125-årsjubileum
i 2005. Oddbjørg Tvergrov har skrive eit attersyn
over dei siste 25 åra i den lokale kyrkjesoga.
Fløydørene til alterskapet har fått
ein eigen artikkel. Jakob E. Øye har skrive ein
prolog om Hjørundfjord kyrkje til Frå Hjørundfjord.
Elles har ein med artiklar om stoff som har runde år.
Arnold Hustad fortel om forsvinningsgåta på
Risestøylen i 1905. På 7-årsdagen
sin vart Ingeborg Riise frå Pegarden sporlaust
borte. Elles døydde Jørgen Hustadnes 9.
januar i år. Han har gledd mange med dagboksnotatane
sine frå 1937-1947. Det viser seg at han har følgt
godt med kva som skjedde i hans kjære Hjørundfjord
også etter at han flytta til Oslo i 1947. Vi tek
med utdrag frå dagbøkene hans for 1954
og 1955.Ein artikkel med hovudvekt på det politiske
livet i Hjørundfjord er også med.
Elles finn ein nokre artiklar med fritt valde emne til
slutt i årsskriftet. Torbjørn Urke tek
oss med på kulturvandringa til Molaupen og Trandal
- ei ugløymande oppleving for dei fleste som
deltok. Årsrevyen som vart introdusert i førre
årsskriftet, vert ein årleg tradisjon.
Skriftstyret vurderer kvar artikkel for seg sjølv
og har mellom anna stor sans for ein dialektnær
uttrykksmåte. Det er svært gledeleg å
kunne fortelje at stofftilgangen berre ser ut til å
auke, og nye skribentar dukkar stadig opp. Denne gongen
er det sjølvsagt at årsskrift for 2006
må ha same hovudtema som dette. Vi har mellom
anna fleire snikkarverkstadar og smier som står
for tur. Like eins bør også anna næringsverksemd
som t.d. pelsdyroppdrett, gartneri og handel få
plass i vår lokale soge. Det er viktig at lesarane
kjem med idéar og tips om aktuelt stoff. Gode
bilete er vi også svært interesserte i.
Skriftstyret vil til slutt rette ei stor takk til alle
som deltek i dugnadsarbeidet som fører til nye
nummer av Frå Hjørundfjord. Takk til artikkelskribentar,
bileteinnsamlarar, illustratørar, alle kjelder
-og alle som deltek i salsapparatet. Vi gløymer
sjølvsagt ikkje alle kjøparar som er det
nødvendige økonomiske grunnlaget for å
realisere komande årsskrift.
For
skriftstyret
Jarle Walseth, redaktør
|