Frå
Hjørundfjord er utgjeve av Hjørundfjord sogelag.
Det er eit årsskrift som kjem ut i desember kvart år.
Viktige mål for sogelaget er å knyte band mellom
hjørundfjordingar før og no, gje røter
og identitet og oppretthalde samt skape kontakt mellom folket
ute og heime. Det hadde elles slett ikkje vore av vegen om
årsskriftet styrkte heimlengten til utflytta hjørundfjordingar,
for i Hjørundfjord sløkkjest lys kvart år.
Vi har nett hatt eit sekelskifte,
og vi kan sjå attende på "det raske århundret"
med ei teknologisk utvikling som i stadig akselerande tempo
endra menneskelivet. "Amerikanarane har kanskje bruk
for telefonen, men vi har det ikkje, vi har nok bodberarar,"
proklamerte William Preece, teknisk sjef for det britiske
postvesenet, i 1976. Også til den avsidesliggande Hjørundfjorden
kom dei ulike nyvinningane, og vart møtt med tru og
mistru - og undring.
Hovudtema for årsskriftet
er å vise den eventyrlege utviklinga som hundreåret
gav, samt fortelje om tankar og kjensler det vekte med "uskjønelege"
oppfinningar som sprengde dei fleste førestellingar
i eit praktisk folk. At vatn kunne brukast til å skaffe
lys, var vanskeleg nok å forstå. Endå verre
var det å tenkje seg at det var mogleg "å
høyre" heilt frå Frankrike til Øye.
Vi kjem også inn på konsekvensar den nye tida
fekk for innbyggarane og grendene kring om i fjorden vår.
Temaet er følgjeleg svært vidt, og stofftilgangen
har vore upåklageleg. I det utselde årsskriftet
Frå Hjørundfjord nr.1 handlar hovudartikkelen
om strandgarden Strandabøen og den usedvanleg utviklingsorienterte
eigaren, Paul Viddal. På Strandabøen var dei
tidleg ute med det meste. Dette stoffet må trykkjast
på nytt, så alt tyder på at vi må
til att med same tematikk minst ein gong til.
Denne gongen vart det ikkje plass
til dagbokstoff, men allereie neste år vil vi prøve
å følgje opp denne populære tradisjonen.
Elles har skriftstyret med gjengangarar som Hjørundfjord
for 100 år sidan og Kai-kulturen i Hjørundfjord.
Denne gongen har vi kome til kaia på Ytre-Standal. Ruvande
i dette årsskriftet er artikkelen til Egil J. Nordang
som gjev eit levande tidsbiletet frå oppveksten sin
på Moane tidleg på 1900-talet, før den
teknologiske utviklinga skaut fart.
Korrekturarbeidet har vorte utført
på vanleg måte. Kvar artikkel er vurdert individuelt,
og skriftstyret har stor sans for den munnlege uttrykksmåten.
Denne gongen opnar forresten årsskriftet med ein perspektivrik
artikkel på bokmål om malaren Joachim Frich og
nokre av motiva han malte i Hjørundfjorden i 1845.
Denne sommaren såg det lenge
mørkt ut for årsskriftet. Vêret var så
umåteleg fint! Heldigvis berga haustregnet skrivedugnaden
vår. Eit nytt produkt frå Hjørundfjord
sogelag er hermed klart for sal, og tradisjonen tru når
vi julesalet. Skriftstyret hadde nok ønskt at fleire
artiklar kom inn tidlegare, slik at vi betre kan få
til m.a. god geografisk fordeling av stoffet, meir tid til
å finne relevante bilete, og meir tid til å finpusse
det innkomne stoffet.
Vi må sjå framover mot
nye prosjekt og nye årsskrift. Gledeleg er det å
registrere at stadig nye artikkelskribentar dukkar opp og
deltek i skrivedugnaden. Dugnadsånda i fjorden er velkjend,
og denne har vist seg særleg sterk i lag og organisasjonar.
Tema for komande årsskrift vert henta frå den
omfattande lagsverksemda i fjorden, truleg ungdomslagsrørsla.
Skriftstyret takkar alle medarbeidarar
og årsskriftkjøparar. Skriftstyret møter
ei imponerande velvilje. Saman kan vi realisere nye årsskrift
for komande år.
For skriftstyret
Jarle Walseth, redaktør
|