"Frå
Hjørundfjord" er utgjeve av Hjørundfjord
sogelag. Det er eit årsskrift som kjem ut i desember
kvart år, og eit hovudmål med skriftet er
å knyte band mellom hjørundfjordingar før
og no, og oppretthalde kontakt mellom hjørundfjordingane
som er heime og dei som er einkvan staden ute i verda.
Hovudtema dette året er helse.
I
skriftet møter vi det gamle bondesamfunnet -
fattige og sjuke -og korleis dei taklar problema. Vi
følgjer utviklinga fram til dagens situasjon
i helse-Norge sett frå mange ulike synsvinklar.
Vi møter dokteren i open færing i storm
og rennefòk på fjorden, og jordmora på
farefull utrykking forbi fonngyl. Så veit vi at
stundom er ulukka ute, og påkjenninga for både
dokter og folk vert nærmast ulideleg.
Årtusenskiftet
er spesielt, og for hjørundfjordingane vart det
ekstra gildt. Tre brør frå Herøy
ga Hjørundfjord kyrkje ei mektig gåve -
Christian III `bibel, ein bibel som tradisjonen kan
plassere attende til kyrkja på Hustad. Like eins
vart ein kunstskatt kjøpt attende til Hjørundfjord.
Ragnar Standal fortel om desse storhenda.
Tradisjonen
tru har også skriftstyret med gjengarar i årsskriftet;
dagbokstoff, kai-kulturen i Hjørundfjord og Hjørundfjord
for hundre år sidan.
Vi ønskjer alltid også å fange folkelivet
og tidsmiljøet - og ikkje minst humoren i bygdene
våre. Til slutt i årsskriftet finn vi artiklar
som heilt ut tilfredsstiller desse siktemåla.
Korrekturarbeidet
er også denne gongen utført på tradisjonelt
vis. Kvar artikkel vert vurdert for seg sjølv,
og skriftstyret har alltid hatt sans for dialektnær
uttrykksmåte.
Så
er igjen målet nådd, og eit nytt årsskrift
ligg klart for sal. Det er alltid eit spørsmål
om det er mogleg å oppretthalde den aktiviteten
vi har hatt med dette arbeidet- særleg vert det
vanskeleg når haustane vert så fine.
I alle fall vil underteikna på vegne av skriftstyret
takke alle som har vore med i arbeidet på dette
årsskriftet.
Ei
ekstra takk til alle interesserte kjøparar som
gjev inspirasjon til dette arbeidet. Så får
ein vel prøve å kome i gang med neste prosjekt,
og denne gongen må det vel verte eit eller anna
om kommunikasjon -eller kanskje om musikklivet?
For
skriftstyret
Jarle Walseth, redaktør
|