Årsmelding for Hjørundfjord kulturvernlag år 2001

Førre årsmøte vart halde på Kristian gard, Trandal, 25. mars 2001. 39 medlemer møtte.

Styret i 2001:
Synnøve Rekkedal Hill                leiar               på val
Per Atle Røe                                nestleiar         
Kjell Arne Årseth                        skrivar            -- ”--
Knut Leknes                                styremedlem  
Helge Skylstad                             -- ”--              -- ”--

Edvin Sætre                                 -- ”--               ny må veljast

Ingeborg Standal                         varamedlem
Ole Johan Riise                            -- ”--              -- ”--
Karl Viddal                                  -- ”--

Valnemnd: Bjarne Viddal, Perry Bjørke, og Kari Anne Bjørke. Revisor: Jon Arne Årseth.

Det har vore halde fire styremøte. Laget har 120 medlemar.

Gåver og tilskot:
Hjørundfjordfondet -------------------------------- kr.      3000,--  til informasjonstavler
Ørsta kommune ------------------------------------  ”        4000,--  kulturmidlar
Tussa  ------------------------------------------------  ”        2500,-- til notanaustet, på Bjørke
Møre og Romsdal fylke, landbruks avd.  -------  ”     30 000,--  til Stavbergsetra, sluttoppgjer
Barstad hyttegrend, Barstadvik, v. Olav Barstad ”          400,--  til infotavle, på Hj.fj.stranda

Hjørundfjord kulturvernlag har, som det går fram av årsmeldinga, hatt eit ganske aktivt år i 2001.

Den 12. mai hadde me ryddedugnad i presteløa på Sæbø, det var godt frammøte og me fekk gjort mykje. Me planlegg ei finrydding, våren  2002, og då også få registrert dei mange gamle gjenstandane som Anders Hustadnes har sytt for å ta vare på, og samla der.

Registreringa av gamle båtar held fram. I år har me hatt synfaring på Bjørke og Viddal. Den truleg eldste registrerte båten båten så langt, skal vere kjøpt i 1841.

Informasjonstavlene som skal oppsetjast på Bjørke, Festøya og Sæbø, er ferdige og skal på plass til våren. Sæbø grendalag vil syte for monteringa på Sæbø.

Prosjektgruppa for krigsminne frå Hjørundfjord, arbeider vidare med saka og har hatt fleire møte gjennom året.

Dei tradisjonelle Hjørundfjorddagane, hadde musikk og instrument som tema i år, og laget deltok her i samarbeid med sogelaget.                               

I samband med den nasjonale verneplanen for vegar, bruer og vegrelaterte kulturminne, har laget sendt ein uttale til Ørsta kommune og kome med ein del tillføyingar som gjeld Hjørundfjorden. Det gjeld Villabrua og Valsetbrua i Bondalen, og kvelvingbrua på Ytre Standal frå 1842. Truleg den eldste daterte på Sunnmøre no.
                                                                                                                                            
Statens landbruksforvalting og fylkeslandbrukssjefen var på synfaring i Ørsta, og dei var  interesserte i bruken av midlane som var løyvde til å ta vare på kulturlandskapet, med bygningsmiljø. Hjørundfjord kulturvernlaget fekk førespurnad frå ordføraren og landbrukssjefen om å orientere om den praktiske delen, når det gjeld å ta vare på kulturminnearven vår. Me takka ja til dette , og Synnøve Rekkedal Hill møtte fram og greidde ut om arbeidet.

I år var det 250 år sidan Hjørundfjord vart eige prestegjeld. Dette vart markert i haust. Kulturvernlaget deltok i markeringa med ei utstilling av gamle biblar, postillar, salmebøker o.l

Magne Årseth, busett i Porsgrunn, har starta arbeidet med å lage ein modell av den gamle Rise-garden som vart utteken av fonna. Kulturvernlaget tek sikte på å syte for finansiering av materialar og glasmonter. Kvar modellen skal plasserast er ikkje avgjort, og me er opne for innspel og idear.

Den årvisse kulturvandringa fann stad sundag 19. august, og  vart tilskipa i samarbeid med sogelaget og soknerådet. Om lag 75 personar deltok på heile eller delar av ruta, som tok til i strålande ver, med gudsteneste på den gamle kyrkjetufta på Hustad. Vidare til Hustadvika, der Andreas Hustad fortalde levande om fortida. Johan M. Riise tok føre seg Øyragata, der ikkje mindre enn tre av husa vart flytta dit heile. Jarle Strandmann overtok ved banken, og greidde ut om busetjingshistoria i Sandvika. Siste stogg var ved det nyrestaurerte Simanaustet, der underteikna fortalde litt om den særmerkte sunnmørsskikken, med gjenbruk av gamle båtar som veggkledning på hus.Vandringa vart avrunda med rjomegraut, kaffi og kaker på bedehuset. Der var temaet prestegardshusa som er prega av dårleg vedlikehald. Fleire tok ordet og presiserte at bevaring av prestegarden er avgjerande for Sæbø sin identitet

Tidlegare distriktshandverkar Sverre Bjørdal, har fullført arbeidet med overvasshjulet til saga på Skjåstad, og det er no kome til Saure. Veita og sloket må ordnast, og me vil prøve å skaffe midlar til dette i år.

Restaurering av notanaustet på Bjørke har drege ut, på grunn av ein viss meiningsskilnad mellom eigarane. Dette har no løyst seg og me vil ta til på arbeidet så snart det vårast. Her har me tidlegare løyvde midlar, kr. 39 000,-- til rådvelde.

Nokre av sakene som me arbeidar med står diverre meir eller mindre i stampe. Årsaka til dette er fyrst og fremst at det har vorte ei innskjerping av reglane for tilskot frå fylkeslandbruks – kontoret. Dette går på drift/ikkje drift av gardane, så sjølv om jorda er vekkleigd og såleis vert driven, får me ikkje av desse midlane. Me synes at denne innskjerpinga er særs uheldig, og  i ei tid der drifta på fleire og fleire av dei små bruka vert nedlagd, kan dette få dramatiske konsekvensar for kulturarven vår.

Overvasshjulet på Saltre, er døme på ei sak som har stogga opp p.g. av denne innskjerpinga.  Det same kan ein til ei viss grad seie om den siste skogaløa på Urke, men her vil laget bruke kr. 10 000,-- av eigne midlar slik at Thomas Hustad kan føreta ei ”fyrstehjelp” for å halde huset ståande. Me har søkt Norges skogeierforbund, og Det norske skogselskap om hjelp til vidare restaurering, og ut ifrå munnleg utsegn har me god von om positivt svar.

Kulturvernlaget har arbeidd i 4 år, opp i mot dei antikvariske institusjonane, for å få stadfest alderen og verneverdien av gamlestova i Bakkegarden på Åkre. For å få vite noko sikkert, lyt ein føreta såkalla dendrokronologisk prøve materialen. No er dette endeleg gjort, i regi av Riksantikvaren, og ein lyt seie at resultatet er både gledeleg og oppsiktsvekkjande. Jan Michael Stornes frå NIKU gjorde det praktiske arbeidet på staden. Terje Thun, NTNU, er ansvarleg for dateringsrapporten. I tillegg til stova vart også grindløa undersøkt.

Resultatet syner at materialen til løa vart fellt i vinterhalvåret 1549/1550. Arkitekt Helge Schjeldrup i Stavanger, som har arbeidd mykje med datering av grindbygde hus, uttalar at:”Grindløa i Bakkegarden er den hittil eldste registrerte i Noreg”.

Eg siterer frå Riksantikvaren sin  rapport, om ein av løestavane: ”Staven har et meget høyt innhold av harpiks og prøvene er dermed meget vanskelige å bore ut hele. Kan sammenlignes med stavene i stavkirkene.”

Når det gjeld stova, so greidde ein ikkje å datere denne så presis. Eg siterer frå rapporten:
”Som det fremgår av dateringsrapporten til Terje Thun,NTNU, så er tømmer fra stua felt etter hhv. 1411, 1465 og 1470. Utifra de erfaringstall som foreligger når det gjelder forholdet mellom antall årringer i malmveden og gjeitveden så kan bygningen godt være samtidig med den grindbygde løa på gården som er dendrokronologisk datert til 1549/50”. Stabburet og stallen vart diverre ikkje undersøkte i denne omgang, men då det er grunn til å tru at desse bygningane også er svært gamle, vil me arbeide for å få fastsett alderen på desse og. Fylkeskonservatoren har uttalt at stabburet truleg er det eldste av husa.

Hjørundfjord kulturvernlag vil leggje mykje arbeid i å få dei turvande midlar på plass, for å ta vare på denne unike kulturskatten som dette tunet representerer. Denne delen av Hjørundfjorden har i tillegg, to-- tre stabbur som er klassifiserte som mellomalderhus, også andre bygningar som truleg ligg nær desse i alder. Eg trur ikkje at ein tek for hardt i om ein slår fast at dette er ein uvanleg konsentrasjon av så  gamle bygningar, på eit såpass avgrensa område, også sett i landssamanheng.

Me reagerte med sjokk og sorg, då me fekk vite at Edvin Sætre hadde gått bort så altfor tidleg. Me sit att med gode minne etter Edvin frå samværet i styret.
Til slutt vil me takke for all velvilje, økonomisk stønad og dugnadshjelp i året som har gått.   

Rise 10. mars 2002, Kjell Arne Årseth, skrivar.