Årsmelding for Hjørundfjord kulturvernlag år 2000

Årsmøtet for 1999 vart halde 9.april på Union hotell, på Øye. 41 medlemar møtte.

Styret i 2000:

Synnøve Rekkedal Hill          leiar                         på val
Per Atle Røe                           nestleiar
Kjell Arne Årseth                   skrivar
Jakob Finnes                           styremedlem           på val
Helge Skylstad                       
Ingeborg Standal                    varamedlem
Ole Johan Riise
Edvin Sætre

Valnemnd: Gunvor Halland, Perry Bjørke, og Kari Anne Bjørke.

Revisor: Jon Arne Aarseth.

Det har vore halde fem styremøte, og to fellesmøte med Hjørundfjord sogelag.
Laget har 155 medlemer, det er 24 meir enn året før. Mange som ikkje bur i Hjørundfjorden, men som har ei tilknyting eller er generelt kulturinteresserte, har etter kvart meldt seg inn.

Gåver og tilskot:
Hjørundfjordfondet ------------------   kr.    2000,--
Ørsta kommune -----------------------  ”      2000,--
Møre og Romsdal fylke -------------   ”   22 000,--   til Stavbergsetra
Christian gaard ------------------------  ”      2000,--   til informasjonstavler
Trandal hyttegrend -------------------  ”       1500,--          --- ”   ---
Gjølaks ---------------------------------  ”       1000,--
Riss modell A/S -----------------------  ”        400,--

Siste året har laget hatt synfaringar på Urke, setra Hjellane som ligg i skogen ovanfor Årsneset, notanaustet på Bjørke, Jogarden på Frøland, og ymse båtar. På Urke var me ein tur fram i dalen og såg på den siste skogaløda(utløa)som står i bygda. Tre av veggene er kledde med gamle båtbord, denne gjenbruken av utrangerte båtar var mykje brukt på Sunnmøre, og er sereigen for dette distriktet. Ytre-Urke har eit kraftverk som for så vidt er ganske intakt, og me var inn og kika på utstyret. Det vart og tid til ein tur inn til Maude, der såg me på  ei lita særmerkt røykstove som står på bøen innanfor garden.

I haust som var, har laget hatt dugnad på Hjellane. Det eldgamle selet til Kåre Årsnes har stått utan tak i fleire år. Medan me vurderar kva me kan gjere og korleis me kan få tak i midlar, vonar me at presenningen som vart godt festa med lekter, vil gje oss eit pusterom. Annlaug Standal serverte god tekkjargraut, etter at arbeidet var utført på ”den einaste” regnversdagen som var i haust.
Det gamle torvtaket  på røykstova i Jogarden hadde tent ut, og kulturvernlaget hjelpte til då Anne Lise og Andreas Riise fekk lagt på tett bylgjeblekk, no seint på hausten.
 
Stavbergsetra i Norangsdalen, er til no, er største prosjektet som kulturvernlaget har hatt ansvaret for. Sist vinter var det uvanleg mykje snø i Hjørundfjordfjella, og eit av dei nyrestaurerte sela fekk blåse av taket. Thomas Hustad har fått dette på plass att, og i tillegg har han innreidd to sel. Som setra ligg der no, like ved vegen, er ho eit blikkfang og ein pryd for dalen. Totalkostnaden med arbeid og materialar er kr. 126 902,--. I tillegg kjem det som eigarane har lagt til sjølve, og dugnadsarbeidet.

Arbeidet med vassaga til Knut Saure, på Skjåstad, har kome eit steg vidare. Thomas Hustad er ferdig med sitt arbeid, og  tittel                Sverre Bjørdal har bygd opp att vasshjulet. Det står enno att arbeid på veita og sloket.

Av andre saker som laget har arbeidd med i år 2000, kan nemnast; restaureringa av Bakke- garden på Åkre, som laget i samarbeid med eigarane, svært gjerne vil kome vidare med. Her lyt me ha lov å seie at kulturavdelinga i fylket og Riksantikvaren burde ha fått meir fortgang i saka, særleg på bakgrunn av deira eigne utsegner om den store verneverdien.

Notanaustet på Bjørke, er ei anna viktig sak. Huset er i seg sjølv verneverdig, i tillegg treng me sårt ein stad til å hysegamle båtar. Ei viss usemje om eigedomsretten til grunnen har til no sett ein stogg i dette prosjektet. Kr. 39 000,-- frå fylket, står enno til disposisjon i denne saka.

Informasjonstavler og mindre skilt, i heile Hjørundfjordområdet, er og ei sak under arbeid.

På Saltre, står det eit stort vasshjul som er til nedfalls.Denne saka er og under arbeid, Thomas Hustad har mellom anna laga ein liten modell av hjulet, for lettare å kunne rekonstruere ein kopi i full storleik.

Under Hjørundfjorddagane i år, hadde kulturvernlaget i samarbeid med sogelaget ei utstilling med helse som tema. Mange stogga ved utstillinga, og responsen var god.

Den årvisse kulturvandringa vart i år lagt til kulturminnedagen den 10. september.Veret kunne ha vore betre, men det var like vel ein bra flokk som samla seg på heimste Holen. Edvard Holen orienterte litt om garden,der folk fekk sjå seg rundt både ute og inne. Tore M. Aarskog fortalde om stampa ved Holeelva, der berre murane syner no. Deltakarane gjekk so til Årskogane, der Tore synte fram både den gamle stavløa og mykje gamal reiskap og utstyr som han hadde lagt fram i kjellaren. Jarle Walseth bidrog med litt historikk og barneminne frå Årskogskulen, som stod til midten av nittenfemtiåra. Ferda gjekk so vidare, til tuftene der Risegarden ein gong låg. Sigmund Årseth fortalde laust og fast frå livet i eit vestlandsk klyngetun i 1940 og 50-åra; slik eit barn opplever det. Veret var sopass surt at vandringa vart nedkorta. So etter ein tur innom kyrkja, der sokneprest Øygard fortalde om altartavla, vart vandringa avslutta med matykt på bedehuset. Sæbø grendalag sytte for god mat; rjomegraut, kaffi og kaker.

Økonomien i laget er stram. Då tilskota frå det offentlege fyrst vert fullt utbetalte til når eit prosjekt er ferdig, har me måtta oppretta ein kassakreditt i sparebanken for å kunne betale materialar og arbeidspengar i tide. Det er ikkje lett å få tilskot og sponsormidlar, utover dei statlege løyvingane som fylket fordelar. Årspengane frå medlemane kjem godt med, og me vil prøve å gå aktivt ut for å få enno fleire medlemar i året som kjem.

Sæbø 16. mars 2001, Kjell Arne Årseth, skrivar