Tua på Hustadneset

Det er ikkje alle dagar det er like fristande å gå tur, når regnbygene truar og skodda heng langt ned i toppane, hadde det vore kjekkast å slye seg heime i sofakroken. Men har du først fått på deg skorne og kome over dørstokken, er det herleg med ein frisk fjelltur. Når du då møter ein flokk blide og kjekke damer som vil vere med, kan det berre bli bra.

Vi var fem som møttest på parkeringsplassen på Hustadneset, det sipa og regna litt, fin temperatur.

Når vi kom opp i enden av beitet dukka det opp tre damer til. Her står eit skilt som viser kvar ein skal ta av frå traktorvegen og opp gjennom granskogen.

I dag var det litt vått og nokså sleipt i granskogen, då er det godt å ha gode sko og gjerne stavar. Vi ga oss god tid, stoppa og fekk att pusten før vi starta på råsa som krokar seg så fint gjennom luftig lauvskog.

Blide damer på Lisjehaugen. Her ligg ein del velta graner, men ikkje noke problem å komme seg forbi og finne att råsa.

Det vart ikkje lange pausene, på slike dagar vert ein fort kald. Damene nyt utsikta mot Lekneset og Nordangsfjorden.

Når vi nærma oss toppen møtte vi Siv, Roy og Torine, dei hadde tjuvstarta og var på veg nedatt.

Fellesbilde ved postboksa på toppen: Bente Kristin frå Åmdalen, Wenche frå Sæbøneset, Ann Helene frå Sæbøneset, Ellen frå Holmestrand, Kanutte frå Sæbø, Unni frå Trondheim, framme: Mariann frå Porsgrunn og Haldis frå Sæbø. No hadde skodda tetna godt til og det var ikkje mykje utsikt lenger.

Posering, lang rekke på ei gammal bjørk!!

Wenche strålar som ei sol, ho har kome over ei gullgruve, store flotte kantarellar. Mor Nutte i bakgrunnen, ho har hendene fulle. Resultatet vart ein full brødpose av skogens gull.