Matøskja 1332 m, Harpehornet 1192 m

Er det djup puddersnø og glimrande forhold for nedkøyring på ski, finn du deg eit anna fjell enn Matøskja. Men har du sans for ein liten ekspedisjon, ja, då kan du gjerne satse på det høgste fjellet mellom Høydalen og Bjørkedalen...

På foto til høgre ser vi fjellet Matøskja.

Alle foto: Fred Ingar Somby og Knut Hustad. Klikk på fotoa for å få dei i stor versjon.

Skifjellet voldingane nærast får tårer i augo av å snakke om, er Eidskyrkja/Kyrkjefjellet. Dette fjellet er med sine 1482 meter også det høgste fjellet i Volda kommune. Men lenger vest ligg det meir anonyme fjellet Matøskja. Likevel er Matøskja er både vakrare, og utsikta frå toppen er betre enn det ho er frå Eidskyrkja. Så er du interessert i toppturar på ski og kjem frå ein nokonlunde danna- og møblert heim, må også ta turen til Matsøskja.


*Kartutsnitt. Ruta frå vestsida av Høydalen er teikna* *inn med raud strek.*	*Her er ruta vi gjekk, teikna inn med raud strek. Arkivfoto: Fred Ingar Somby.*

Med sine 1332 m er Matøskja eit heller høgt fjell, men normalruta til topps, som går frå den øvste garden i Høydalen, er på heile sju kilometer. Difor vert oppstigninga/ nedkøyringa heller slakk og når du i tillegg må gå ca. 50 høgdemeter nedover før du kan ta til med toppstøyten, seier det seg sjølv at du vel ein annan topp når køyreforholda på ski er på sitt beste. Men har du sans for ein liten ekspedisjon i godt lag ein vinterdag, ja, då er Matøskja absolutt noko å satse på.


*Det er lite snø i fjellet no i februar*	*På veg mot Grøndalsvatnet, sjå kartutsnitt*

Det er ikkje så vanskeleg å finne fram, men det er klokt å ta med eit kart, eller ein slik GPS-greie. Køyr til vegs ende, opp til den øvste garden på vestsida av Høydalen. Har du parkert og ser oppover, skal du bort til dalsøkket opp til venstre. Kanskje kan det vere klokt å gå etter den ca. 2 km lange ubrøyta vegen vidare oppover om det er lite snø.

Etter kvart kjem du opp til eit vatn, Grøndalsvatnet. Er isen trygg, gjer du som vi gjorde - kryssar isen med godt samvit. Deretter går du vidare i same retning til du kjem opp på ryggen, bryt så av til venstre og gå oppover dalen mellom Blåfjellet og Harpehornet, dalen som lignar på ein stor half-pipe.

Etter at Grøndalsvatnet er kryssa og du har teke til venstre etter å ha nått
ryggen, opnar utsikta seg mot Voldsfjorden og Volda.

Dalen mellom Blåfjellet og Harpehornet minner om ein stor Half-pipe.

Etter at "half-pipen" er passert, opnar terrenget seg - og her fekk vi endeleg litt laussnø, i ca. 1100 meters høgde. Vi såg no fjella Eggene opp- og bort til venstre og gjekk dit, men vil du gå kortaste vegen til Matøskja går du berre slakt opp- og rett framover etter denne "half-pipen". Etter kvart ser du Matsøkja rett imot. Minuset er at du må gå ca. 50 høgdemeter nedover før du, som nemnt, kan ta til med toppstøyten.


*Jakob N. Hustad har passert Eggene på 1288 m,* *bak til høgre.*	*Før du kan ta til med toppstøyten på Matøskja, til* *venstre, må du ca. 50 høgdemeter nedove*r.

Som du ser av fotoa går turen til Matøskja gjennom vekslande terreng og landskap. Du må sjølv bestemme om du vil setje att skine rett under toppen, men er føret bra er det uproblematisk å ta dei med til topps, men det er klokt å feste dei til sekken først.

Med eller utan ski til topps? Valet er ditt.

Utsikta frå toppen av Matøskja er framifrå. Her ser vi ut Voldsfjorden og
vidare mot havet. Eit toppturfoto høyrer også med. Frå venstre: Fred Ingar
Somby, Jakob N.Hustad og underskrivne Knut Hustad.

Det er altså svært lite snø i fjellet og kanskje er det mindre i Matøskjaområdet enn lenger inne i landet? Likevel må det seiast at vi også fekk ein fin tur nedover mot utgangspunktet igjen. Turen frå Grøndalsvatnet og ned dalen - Skibrekkdalen? - til vegen var kort og godt triveleg - og betre vil han bli med noko meir snø på toppen.

Men på veg ned var vi sjølvsagt ein avstikkar bortom Harpehornet. (Men ned herifrå vart det nok ein del striper under skina p.g.a. stor stein og lite snø)


Fred Ingar angra ikkje på at han tok med ski heilt *til topps på Matøskja.*	*Men det er aldri populært å bere ski oppover når* *ein eigentleg skal renne nedover.*