Sigmund Årseth vart fødd her i Hjørundfjorden i 1936. Onsdag 12. desember kom den triste meldinga - Sigmund var død.
 |
| Sigmund Årseth er død, 76 år gammal |
Sigmund Årseth var utan tvil verdsmann. Han ville sjølv ikkje likt ordet, men han var Hjørundfjorden sin største kjendis. Han kjende svært mange, både i inn- og utland - og minst like mange kjende han. Som vi veit var Sigmund kunstnar. Vi kjenner han best for dei flotte måleria han laga, også dei med motiv herifrå Hjørundfjorden, men han hadde også t.d. kurs og dekorasjosnoppdrag i mange statar i USA.
Sigmund vart sett svært stor pris på av mange og han fekk også St. Olavsmedaljen. Men det eg hugsar han mest som, er mannen som brydde seg. Han visste svært godt kvar han kom ifrå og sjølv om han var ein svært travel mann, brydde han seg om kvar enkelt av oss. Siste gongen eg fekk treffe han, var i sommar - i inngangsdøra til Bellingen på Sæbø. Hadde eg tid til å vere med ein tur utanfor? Som vanleg var Sigmund full av planar og idear.
Så vart det eit handtrykk og eit på gjensyn. Det vart det diverre ikkje. Som så svært mange andre tillet eg meg å kalla Sigmund min gode ven. No må vi greie oss utan denne heidersmannen frå Hjørundfjorden og Valdres.
Kommentarar
Ein av dei siste samtalane som eg hadde med han på telefonen, snakka han nettopp om tilknytninga til garden våra, der han var fødde og vi to var av dei siste levande i dag som var fødde heime i stova på Gótene.
Det var 18 år forskjell mellom oss, og i min barndom såg eg opp til Sigmund og Ingebjørg. Vi var stolte av bilde på ein kalendar der dei dansa folkedans på museumet på Fagernes og målarmeister Sigmund vart kjend som rosemålaren frå Valdres. Dette var stort for oss å kjenne denne mannen og få kome på besøk til han og Ingebjørg i Valdres. Etter eg sjølv vart voksen, så har vi vore kamerater og rosmålinga vart det mindre av til fordel for kunstmålaren Sigmund som var i konstant læring, og han lærte villigt vekk og fortalde om fargar og korleis han fekk djupte i måleria. Vi kunne sjå, år for år, korleis han utvikla seg til å verte ein av våre største kunstmålarar.
Sigmund var også ein god forteljar med ein krystallklar hukommelse og det var mange gonger at han var på besøk der både store og små samla seg rundt han, for å høyre på den levande forteljarmåten hans.
På fredag vert Sigmund ført til grava i Volbu kyrkje og kyrkja vert heilt sikkert for lita då det vert mange som har lyst å være med denne store mannen til siste kvilestad.
Med stor respekt for Sigmund - Ivar Svein Mo