Nyleg har vi lese i avisene at arbeidet med å få kunstgrasbane på Sæbø er godt i gang. Det rimelegaste alternativet er visstnok å legge kunstgras på grusbana - rundt 4 millionar kroner. Kostnaden med å gjere grasbana om til kunstgrasbane vil kanskje ligge på 6 - 7 millionar kroner. Kva meiner du?
Her ser vi dei to fotballbanene på Sæbø, grusbana og grasbana. Bør ei av desse banene bli kunstgrasbane? I så fall; kva for ei?
Ørsta har si kunstgrasbane, snart har Åmdalen si. Er ikkje det på tide at Sæbø IL også får si eiga kunstgrasbane?
Det vert altså arbeidd med å få til ei kunstgrasbane på Sæbø. Det mest realistiske alternativet skal vere å gjere grusbana om til ei slik bane. Men då ryk parkeringsplassane der. Vil det i så fall seie at det vert slutt på Hjørundfjorddagane, Sæbø IL si viktigaste inntektskjelde? Eller vil ei kunstgrasbane føre til auka trivsel og på sikt folketalsauke i Hjørundfjorden?
Men grasbana er dårleg. Vil ikkje det vere rett å gjere den om til kunstgrasbane? Nei, det vil verte for dyrt, seier nokre. Andre igjen vil ikkje ha kunstgrasbane i det heile. Kvar skal vi få pengane ifrå? Skal vi sløse vekk mange millionar på nokre få fotballspelarar?
Spørsmåla er mange. Kva seier du? Legg att di meining i kommentarfeltet under, eller kom med meininga di i meiningsmålingsfeltet nede til venstre på framsida.