Kva skjer?
Eg kjenner til at antan Sogelaget eller Kulturvernlaget har teke initiativ for å starte opp eit slikt arbeid. Det var nemnt innkjøp av skanneutstyr. Det kan vere greit å få ei oppfrisking av stoda - kanskje her på portalen?
Dette kortet er kalla "Extraforteneste i Turisttiden." Motivet er frå Øye. Knudsen eller Lindal er fotograf.
Vi veit at ein trufast prospektkortsamlar (og fotosamlar) i Ørsta, Jostein O. Mo, sit på ei rik kjelde. Kanskje kunne det vere ein tanke å lytte til hans erfaringar og kva kjelde han rår over.
Kvar har det blitt av restlageret av prospekorta som t.d. Øye Landhandel selde?
Leknestunet i 1880-åra. Foto K. Knudsen. Kjøpt på auksjon.
Albumar
Så langt har eg vist eit par prospektkort. Men kva med privte fotoalbum? Rundt om i heimane er der mange foto som har stor historisk interesse, Personane er ein del av historia, men så er det omgivnadene som og er viktig å få med.
Døme på familiebilete der både personane, lokaliteten og arbeidssituasjonen har historisk interesse. Dette fotoet er frå Torstein K. Urke i sin album. Torstein budde i Vegsund i Ålesund.
Vi må hugse at i ein album er det ofte notert både årstal og namn som hjelper til i registreringa. Sjå berre biletet ovanfor!
Utanombygds
finn vi og albumar som har stor interesse. Søner og døtre vandra ut og kom gjerne ein tur heim om somrane, både for å hjelpe til i slåtten og for å vise fram både born og ektefelle. Dei hadde gjerne skaffa seg fotoapparat og tok bilete for å friske opp minne i ettertid. Det er ei utfordring å finne tak i albumar som utflytta bygdefolk (og deira etterkomarar) har liggande.
Her er eit typisk døme på eit slikt bilete:
Eg hadde ikkje sett bilete av oldefar min (utanom bryllaupsbiletet) før eg fekk titte i albumen etter tante Anna på Skodje. Her ser vi gamle Sivert (1846-1937) i hagen bortanfor bustadhuset. Men i tillegg ser vi at gamleløda er riven og dei er i ferd med å starte graving av tomta til nyeløda. Vidare er berre eitt drivhus oppkome. Solhaug, bustaden til Hustadnesfamilien (ferdig haust 38) og butikken framme på Haugen er sjølvsagt ikkje komen. Dermed er det nok opplysningar til å tidfeste biletet til 1933/34.
Men tilbake til utgangspunktet:
Kven kan orientere oss litt om stoda når det gjeld dette registreringsarbeidet?
Gjerne her på portalen!
Kommentarar
Eg, du, Torbjørn Urke og Knut Riise vart spurd om å delta og vi sa ja. Slik eg forsto det, skulle du være kontaktpersonen for Norangsfjorden og Torbjørn Urke skulle være for Bjørkeområdet og eg og Knut skulle ha Bondalen. Årsmøte valde ikkje nokon leiar, for det skulle nemnda velje sjølv. Her var det nok det stoppa opp. Eg trur ein gong eg sende enten ein SMS eller epost til medlemmane, men fekk ikkje noko tilbakemelding og dermed vart det ikkje noko meir frå meg.
Då er spørsmålet, vil sogelaget forsatt ha oss og vi er interesserte i å arbeide med saka, skal vi då samle oss og ta eit tak i dette viktige arbeidet?
Eg erindrar at eg ein gong har sagt ja til å vere med på ein slik dugnad, men der stoppar det opp - i alle fall for mitt vedkomande.
Vi bør få til eit møte ein ettermiddag og ta stilling til
- ei klarering frå sogelaget si side
- utstyr og arbeidsmetodikk
- tidsrammer for ferdigstilling
- dessutan er det lurt å ha nokon som er ansvarleg for innkalling og leiing. Når ingen skal leie, bestiller ein samtidig at ingen ting skal skje!
- Leiar i sogelaget bør kalle inn til første møte og samtidig orientere om sogelaget si målsetting og rammer.
Det er og teke kontakt med Jostein O. Mo, kultursjefen, for å få han til å rettleie nemnda i ein tidleg fase.
Kanskje lesarane tek til å tenkje over kva som kan finnast som nemnda må få kunnskap om? Vi veit at Sogelaget har nemnt tanken om å gi ut ei biletbok av resultatet. Kanskje noko som minner om dei mange "Ørsta-Album" som Jostein Mo har gitt ut? Dette bør inspirere oss til å gjere eit nødvendig arbeid.
Og om ikkje alt vert publisert, er det likevel overmåte viktig å få registrert gamle foto!