Når eg er ferdig i fjøsen om morgonen kastar eg som oftast eit blikk bort på Grøtdalstinden. Eg tenkjer ikkje over kva det er eg ser etter, men kanskje er det eit skispor, eller kan det vere eit vêrteikn? Fotoa under er tekne på same dag - sist fredag (17.12.10)
Kjøleg, men vakker morgonstemning. Dette er altså Grøtdalstinden - den søre. Foto teke klokka 0915
Same fjellet, sett frå Hustadbrua. Men her ser du også den midtre og den nordre av Grøtdalstindane. Foto teke klokka 1032
Det er ikkje så mange timane at sola er oppe. Fotoet til høgre er teke klokka 1450.
Men det var først på fredag at eg vart klar over at det var ei lysfontene bak Jakta.
Fjellet Jakta med lysfontena bak.
Frostrøyken ligg over Hjørundfjorden, men endene i nedre biletkant ser ut til å greie seg godt - sikkert takka vere hamnefogd Thomas Hustad som matar dei dagleg.
Fotoet under skulle ha vore vist på film. Ut på etterdiddagen oppdaga eg frå huset her at det ikkje var ei lysfontene, men ei vindpumpe bak Kollen (Kvistad-/Moakollen) og Storhornet. Nabo Asbjørn Moe kunne opplyse at det var sørvesten som gjorde seg gjeldane. Same kva - snøen kom fykande i store mengder over det nettopp Kollen. Torsdag føremiddag kom det svært mykje snø. Fredag gjorde vinden tydelegvis sitt for å fjerne han.
Ikkje skodde, men snø er det som kjem fykande over Kollen.
Så er klokka 1614 og månen slår fast at den korte dagen er over. Her kliv han opp over Storehornet.
Den blå timen er her allereie. Den korte dagen går over til natt.
Fotoa under er teke frå huset vårt dagen før.
Sola har enno ikkje kome fram men ho syner likevel att på himmelen og fjella. Klokka er 0934 og 0938
Og så må vi ha med ein quiz. Fotoet under er dagsferskt. Veit du kvar skikøyraren er akkurat her?
Kvar er denne skikøyraren akkurat på dette tidspunktet?
Kommentarar
A pro pos fyking så traff vi ein "minitwister" ved Årvikgjølet fredag, først framfor oss, så v fjordbredden. Lurte ei stund på, om det nettopp hadde gått ei lita mjølfonn, og lista oss forsiktig rundt svingen. Men tomt i gjølet.
Stormen som gjekk over Kollen var eg og mor mi vitne til på fredag, og det var ein iskald vind som kom med snøkave heilt ned til husa med oss. Det heile løyste seg opp med tynnaknutar nedgjennom fjellsida. Dette var heilt spesielt å sjå. Men eg bedømte at vinden kom aust frå, og kanskje i nordaustleg retning.
Då mor mi(86) var lita jentunge, så høyrde ho av gamlefolket at når slike hendingar på Kollen skjedde, var det Kolla-Jørn og kona Guri som dreiv på med eitkvart. Kanskje var det juleforberedelse dei var i gong med denne gongen? :-))
Ser ut til at det er finfint toppturføre nå?
Hvor skikjøreren er har jeg ikke peiling på , men siden jeg lurer på hvordan forholdene er på Grøtdalstind kan jeg jo gjette på ett eller annet sted på vei ned fra denne?
Hei- og takk for sist til deg, Henrik, også. Er du her i området? Vi skulle sjølvsagt hatt ein oppdatert ski-/fjellguide her på portalen, men når det gjeld føret no så kom her i alle fall ein halv meter nysnø på torsdag, men fredag og laurdag var det mykje vind i fjellet. I går, søndag, var det eit litt ekkelt skorpelag på dei utsette stadane, spesielt for telemarkkøyrarane, men på lesidene er det nok fint, men dessverre farlig. Det har gått fleire skred i fjellet, sikkert torsdag etermiddag.
Men berre så det er sagt - no er det 10-15 cm fjørlett nysnø ute, og minus 8.
Skikøyraren på fotoet er på veg ned mot Aldalen(Volda) frå Koppefjellområdet