Påske-linjer

Etter at det skein av på ettermiddagen skjærtorsdag, fann eg og læresveinane mine ut at vi ville leggje nattverda til Patchell-hytta. Vi nådde nett fram før det mørkna - etter ein heller tung tur opp Skylstad-brekka. Men i motsetnad til Peter, sette ikkje Åsmund seg på bakbeina denne gongen. Til gjengjeld vaska eg føtene hans når vi var vel framme. Eit par timar seinare skimta vi ei hovudlykt på veg opp Habbostaddalen, noko som tydde på at også den andre læresveinen, Benjamin H., hadde funne den rette vegen. Den lange fredagen starta med stiv kuling og snøføyke, men slutta langt lukkelegare for meg og læresveinane enn for han i analogien. Vi fekk nemleg køyrd ei påske-linje som lenge har stått på programmet - i puddersnø. Ho startar like under toppen av Store Brekketind og hellar på det meste kring 50 grader 300 høgdemeter beint ned på exiten på Gullmorbreen (Merka med raud strek på biletet). På slutten av dagen måtte eg gjere vendreis, men læresveinane var byrge nok til å ta seg til rette på ei paralell-linje dagen etter (merka med grøn strek på biletet). Eg kjem kanskje attende med action-bilete når eg får dei frå den bortreiste læresveinen Benjamin. Kan hende blir det også ei skildring av ei linje eg køyrde i Nordre Sætretind tidlegare i påska, i tillegg til eit par bilete av årets X-Tind-trase.