Markens grøde!

No er potetene oppe av jorda og trygt i hus.
kvart år har vi i Risefamilia dugnad på ein solid potetåker, til glede og forargelse for små og store i slekta.
Det er ikkje mange att som har eigen åker, det var og endel år vi og hadde berre "kjøpepotete", men no har dette vorte ein årviss tradisjon der Gunvor held oss med kaffimat, og små og store grev i molda.

Her er Alexander, Nikolai, og Sunniva klar til full innsats i potetåkeren.

Åkeren har vore på ulike stadar, oppi bakkane på Stokke, rundt omkring på Gamlerise, men i år var den nedanfor løda på Stokke.

Her er gjengen i kjent stil, Ole kjøyrer mest utan stopp når vi er mange som plukkar.

Frå venstre Rolfen, Bente, Marit, Sunniva, Rebekka, Mikkel og Alexander.

Her er maskinparken i orden, dette er reine "potetmercedesen"

Dette er luksus for meg som vaks opp i "våtmark" der kvar potete måtte plukkast med hakkegrev!

Som de ser her, må ein tidleg krøkast som god krok skal bli!

Eskil er plassert trygt på sidelinja, alle er med!

Litt sjonglering, Sunniva er reine sjongløren, men Marit ser beundrande på.

Det var litt fleire som prøvde seg på sjonglering, men med mindre hell.

Det er ikkje rart at ein frustrert ungdom kan kjyle ei småpotete eller to etter slike velplasserte blinkar!

Frå venstre Nanna, Rolfen og Arve.

Det er nokon som kan det, Nikolai finn ei god stilling å slappe av i etter ei arbeidsøkt.

No er kassene fulle og sekkane godt oppfyllte, vi har antakeleg potete til neste haust, alle saman.

Blitsen var fyllt til randen før åkeren var tom.

Store fine potete, godt potetår!

Litt tid for pause, sakeleg potetprat, ja dinne gongen gjorde me rett, sette passe småpotete.

Her er Nikolai med ei flott samling "potetekjerringa"

Ekje dei fine vel?

Og so er det mat, nydelige kanelsnurra med sukker på og kaffi til.

Med mold på hendene ...smakar det ekstra godt!

Alle kosar seg med maten.

Her ,litt utenom tema, Marta har fått sydd ferdig rullapølsene, snakk om matauk!

Lagt inn av Bodil Skare
17.10.2007 12:06

Kommentarar

Ivar Svein Mo - Ein fin tradisjon med poteter. 17.10.2007 kl. 21:49

Var det ein gong ein traff naboane før i tida så var det når potetene skulle opp. Då slo 2 og 3 gardsbruk seg saman og tok opp potetene, og poteteopptakinga kunne vare i ei heil veke. Vi borna hadde fri frå skulen når heimepotetene skulle opp, og det var ikkje alle tider så spennande å plukke poteter, men du verden kor kjekt det var når det var middag og nons, og alle var samla.
Ein ting vi gutane passa på var å lage oss rognetrode som var spissa i enden slik vi kunne sette på småpoteter, og då hadde vi ei kraftig slynge, så poteta kunne gå langt avgarde. Denne troda måtte vi lage til kvelden før, og gøyme den så vi hadde den klar til dagen etterpå. Det var ikkje så populært å kaste poteter og skulle vi treffe einkvan så var ikkje potetåkerpolitiet langt unna, og då var det kort prosess.
Det var i allefall kjekt å sjå denne artikkelen om potetopptaking på Stokke. Kanskje neste år vil husbonden lære frå seg å kaste poteter med rognetrode, han var sikker skikkeleg god til det for ei 40 år sidan!

Unn Frøland - Tradisjon 17.10.2007 kl. 21:57

Bestemor Marta fortalte at det var vanleg å gi ei potet-kjerring til den garden som var seinast med å ta opp potetene.
Syns å huske at me lærte på Gjermundnes at små sette-poteter gav få store poteter og store settepoteter gav mange små. Kan dette stemme? Teorien må være antal ålar?

Einar Arve Nordang - Årets potehaust på Øye 18.10.2007 kl. 07:28

Eg sette nokre forer med poteter sjølv, i år vart dei angrepne av tørråte og det vart ingen suksess. Eg får nok legge åkeren brakk nokre år før eg prøver igjen.

Bodil Skare - Settepotete! 18.10.2007 kl. 10:13

Enig med deg Unn, små settepotete gjev store potete og omvendt,det er egentlig logisk.
Dinna "potetetroda"he eg ikkje haurt om, det var artigt.
Ole må ha eit "kurs" neste år.

Enok Kippersund - Så gildt! 18.10.2007 kl. 14:42

Så gildt med ei slik forteljar-grøde! Så mange flinke folk på portalen som både skriv og fotograferer med både haudet og hjartet!

Og tenk på alle som aldri har sett slikt før, og som kanskje kjem i tvil om poteta veks i tre eller blir laga i store fabrikkar1

#;-)

Takk for potet-hugnad!

Knut Riise - Potetslynge ja! 18.10.2007 kl. 22:06

For nesten 50 år sia var det vanleg med 2-3mål med poteter. Det var traudigt arbeid for gutungar å halde på så lenge. Vi lurte oss til å lage slynger av rogn og kasta småpoteter når dei vaksne såg ein annan veg, eller når han far pløgde opp ei ny fåre. Men vi hadde stor respekt for Larsa-Ole, så det fekk ikkje utvikle seg til krig. Men på andre sida av hovedvegen, på Lensmannsgarden var det betydeleg friskare. Hole-Andreas var paktar og hadde 3 friske karar som var litt eldre enn oss. Der hagla det periodevis, og stemninga var tildels amper av og til. Ein dag vi gjekk til middag, sa Andreas til far: Kasta ´kje gutane dine potete, Johan?
Han far kunne no svare for seg, så han sa: Nei våre potete e so store at dei vinn ikkje noke med dei. Då grynta han Andreas tilbake: Du verte no f... ikkje bedre!

Skriv kommentar:
Logg inn for å kunne skrive kommentarar