Vi har sett og høyrt det; mange stadar i Noreg har vinteren kome for fullt. Men ikkje hos oss i Hjørundfjorden. Ikkje kom det særleg snø i natt heller, men utover dagen i dag vart det kvitt over heile fjorden.
Desse benkane på parkeringsplassen på Bondalseidet, v/rv. 655, brukar å vere ein populær samlingsplass - spesielt for dei som driv med paragliding. Men i dag fekk dei stå ubrukt.
Dei siste dagane har vi sett trasten og staren samle seg i store flokkar. Dei har nok kjent det på gikta, vinteren er på veg. Mange av desse fuglane er nok no på veg mot vinterbustadane sine. Hjorten har stort sett slutta å bura, men likevel høyrde eg eit litt sorgtungt gaul frå ein i dag. Truleg ropte han ut: "Vert det ikkje noko på meg i dag heller"?
No er nok flesteparten av sauene også kome i hus, og sjølv dei største optimistane kvir seg nok for å køyre særleg langt med sommardekk på bilen.
Til venstre ser vi at det framleis kan vere lauv på bjørka sjølv om den friske grønfargen for lengst er vekke. Lønnen, på foto til høgre, derimot, brukar å vere eit av dei siste treslaga som tek vinter. Til gjengjeld må han nok finne seg i at nokre greiner brotnar i løpet av natta dersom det kjem mykje snø.
På ingressbiletet ser vi at nypene framleis er raude og fine. Kan ein lage vin av desse? Steinen i nypene er i alle fall fine som kløpulver. Stapp nokre ned mellom skjortekragen og kjenn etter om det stemmer. Elles er det ein hyll under lønnen over. I år har den svarte og fine bær. Eg veit at i Svein Stavset har laga vin av slike bær i år. Tek han imot besøk, tru?
Men fredag regnar det igjen. Kjem hausten tilbake?
Kommentarar