Nr. 7 - M/S Hjørundfjord - arbeidshesten

Det var i vår knytt stor spenning til kven som ville få oppdraget med skyssbåttenesta på Hjørundfjorden. For første gong vart tenesta lagt ut på tilbod. Ørsta kommune bestemte seg for Oddvar Olsen og M/S Hjørundjford, og frå 1. april var båten i teneste. M/S Hjørundfjord er nummer sju på hjorundfjord.no si ti-på-topp-liste.

M/S Hjørundfjord kan brukast til så mongt. Både å frakte fotballspelarar og sauer.

M/S Hjørundjford kom i drift den 1.april. Då tok båten over etter M/S Rødhette. M/S Hjørundfjord viste seg snart å vere ein nyttig samfunnsbåt.

Båten har avtale med Ørsta kommune om viktige samfunnsoppdrag. Båten skal frakte skuleelevar, lege og helsepersonell. I tillegg er det arbeidsruta for einskilde, og han er svært viktig i reiselivssatsinga i Hjørundfjorden.

Til dømes er båten viktig for dei som vel frå tind til tare-konseptet. Sjølv om det er nedfart frå Skårasalen som er ruta, kan siste ferje ha gått frå Skår, og då er det M/S Hjørundjford som er berginga.

M/S Hjørundfjord tek på seg mest alle moglege oppdrag, om det er å frakte folk heim til Ålesund, Hareid eller andre stader etter kveldar på Hjørundfjorden sine utestader, eller om det er å frakte sauer heim frå Maradalen til Sæbøneset, eller fotballfolk heim frå Kvamsøya.

For folk på austsida av Hjørundjforden er båten heilt avgjerande. Ferjesambandet stengjer kl. 22.15, og etter det er M/S Hjørundfjord berginga. Skal folk nytte seg av kulturtilbodet i Ørsta/Volda er båten avgjerande.

Og ikkje minst med eit arbeidsliv som krev at folk er på arbeid til alle døgerets tider, er båten berginga.

hjorundjford.no er svært takknemlege for å ha eit slikt tilbod i fjorden. Ja, det er nærmast livsnerva. Oppmodinga frå hjorundfjord.no er følgjande: Bruk båten.