Sæbø-jubel over tre poeng. F.v.: Terje Holen, Mats Riise og Marius Riise.
Sæbø hadde det spelemessige overtaket mest heile kampen, men i første omgang vart det noko upresist i siste fase mot Tjhørvåg sitt mål. I staden for å rulle opp langs flankane, vart ballen for raskt slått opp mot bakromma, utan at der var spelarar.
Tjørvåg tok leiinga eit kvarter ut i kampen, og målet kom mest ut i frå ingenting. Ein Tjørvåg-spelar kom med eitt åleine mot Martin Liaskar i Sæbø-målet, og han var sjanselaus på skotet.
Sæbø-spelarane let seg ikkje stresse, og heldt fram med å dominere i banespelet. Etter kvart vart spelarane også meir presise i angrepsspelet, og etter tretti minutt kom utlikninga. Marius Riise kom laus på hjørnet av sekstenmeteren, og la inn til Terje Holen som nikka ballen i krysset.
Fleire mål vart det ikkje før pause, og Sæbø opna andre omgang forrykande. Laget gjekk rett frå avspark og i angrep. Yngve Frøland, som er heime på permisjon frå militærteneste i Varanger, kom seg laus på høgrekanten. Han la ut i feltet til Terje Holen, som frå elleve meter skaut over.
Utover i omgangen dominerte Sæbø kampen stort, og Tjørvåg-spelarane vart meir og meir slitne.
Etter 71 minutt vart det 2-1. Marius Riise slo eit frispark mot første stolpe, og der dukka bror Mats Riise opp og nikka ballen i mål.
Etter dette prøvde Tjørvåg å kome høgare på bana, men det gav berre meir rom for Sæbø-kontringar. Fem minutt før slutt vart kampen avgjort då Terje Stokke kom seg laus på venstresida, og la fint inn framfor mål der Marius Riise putta ballen i mål frå kort hald.
Sæbø kontrollerte kampen ut, og tok ein fortent trepoengar. Heile Sæbø-laget var solid, og spesielt det defensive spelet var upåklageleg.
Neste kamp for Sæbø er mot Gjerdsvika på Sæbø stadion komande måndag. Sjå aktivitetskalenderen.
6. div. Avdeling 2
| Lag | S | Vunnet | Uavgjort | Tapt | Mål | Poeng | |
|---|---|---|---|---|---|---|---|
| 1. | Åmdal | 10 | 7 | 2 | 1 | 28 - 10 | 23 |
 | |||||||
| 2. | Sæbø | 10 | 7 | 1 | 2 | 29 - 13 | 22 |
| |||||||
| 3. | Bergsøy 2 | 10 | 6 | 2 | 2 | 32 - 21 | 20 |
| 4. | Åheim/ÅVK 2 | 10 | 6 | 1 | 3 | 32 - 26 | 19 |
| 5. | Tjørvåg | 10 | 5 | 2 | 3 | 29 - 21 | 17 |
| 6. | Moldtustranda | 10 | 2 | 2 | 6 | 12 - 25 | 8 |
| 7. | Gjerdsvika | 11 | 2 | 2 | 7 | 17 - 35 | 8 |
| 8. | Flø | 10 | 2 | 1 | 7 | 14 - 30 | 7 |
| 9. | Kvamsøy | 9 | 1 | 1 | 7 | 16 - 28 | 4 |
Kommentarar