Sit du ute på verandaen din og drikk morgonkaffien, eller tek deg ein tur i skog og mark, vil du nok oppdage denne frua her, eller i alle høve sjå resultatet av det arbeidet ho har gjort i løpet av natta.
No er eg ikkje sikker på det offisielle namnet hennar, men eg lærde ein gong i tida at dyret heitte vevkjerring og var heilt ufarleg. I dag kallar dei yngste av oss denne frua for edderkopp - og dermed vert ho farleg. Ja, eg berre spør eg: Er det ein eller annan som kan svare på om dette trivelege dyret verkeleg kan vere farleg?
Vevkjerringa ovanfor, ho er eit praktekseplar av arten. Eg fann henne i ei steinrøys i ei fjellside, men ho likte ikkje å verte fotografert. Difor snudde ho hovudet og gjekk nedover. Uhøfleg som eg var, fotograferte eg likevel. Dermed vart det bakparten hennar som kom i fokus.
Sjølvsagt avliva eg ikkje dyret etterpå - det skulle berre mangle. Heller ikkje øydela eg nettet ho hadde spunne, eller sleit av den solide tråden som var spent ut mellom to store steinblokker og som nettet igjen var festa i. Nei, ver du sikker. Hadde eg slite av den solide tråden hadde nok dei store steinblokkene mist forankringane sine og dermed hadde sikkert heile steinrøysa rasa ut. Nei, kryp under, eller gå rundt.
Med kva heiter dyret?