Det er 41 elevar på ungdomssteget på Sæbø, men diverre var nokre sjuke, slik at ved avmarsj frå Kvistadsetra sto 36 elevar og fire lærarar klare til den store utfordringa, og stor utfordring var det.Haustturane til skulen har til vanleg gått i lavlandet, men no skulle vi beseire ein 1542 m høg topp. Særleg stor utfordring var det for fleire av elevane som aldri hadde vor på ein slik fjelltopp før.

Nokre av elevane sprang som fjellgeiter oppover, men dei var særs flinke til å stoppe og vente på dei som trengte litt lengre tid. Då det verkeleg tok til å tære på kreftene til fleire av elevane flata terrenget ut og etter kvart kunne ein sjå toppen. Dette gav den inspirasjon som var naudsynt for å orke det siste stykket, og klokka eitt var alle elevane og dei fire lærarane samla på toppen. Dette synest både lærarar og elevar var så imponerande at vi samla alle til eit toppbilde med historisk sus, alle ungdomsskuleelevane på toppen av Skårasalen. Berre synd at vi ikkje kunne sjå ned på skulen og elevane i 1. - 7. klasse som måtte slite over skulebøkene. Men elles var utsikten fantastisk, ikkje minst utover Hjørundfjorden. Klokka halv fire var vi nede på Kvistadsetra der rektor og foreldre sto klare til å hente oss. Her kan du sjå bilete frå turen.