Besøkstal på Hjørundfjordportalen i 2013

Tala som vert lagt fram er nyttig lesing. Ein kunne gjerne ønskje fleire visingar på både det eine eller det andre av innlegga. Likevel må ein ta omsyn til at portalen skal kjempe om merksemd i konkurranse med svært mange. Portalen har heller ikkje så veldig mange ein kan forvente vil bruke portalen.
Portalen har ei lesargruppe som bur utanfor Hjørundfjordområdet og desse set pris på det som kjem på portalen - utan nødvendig vis å gjere seg så sterkt gjeldande på debattsidene.

Eg lurer og litt på om portalen kunne ha gjort noko for å få med fleire brukarar:

Kvifor er det ingen frå Norangsfjorden som skriv eller kommenterer? Kan grendalaga formidle opplæring og stimulere interessa for å ha dette forumet?

Kan strukturen på hovudsida endrast slik at det er lettare å finne veg til oppslaga? Personleg veit eg at ein artikkel som presenterer Hjørundfjorden på norsk, engelsk og tysk vart lese 4.554 gonger i 2013 (utlagt nov./des.2012).
Eg forstår difor ikkje kvifor Tourist information i alt hadde berre 1486 visningar - sidan denne artikkelen normalt vert opna via Tourist information?
Er det fordi nokre går rett på linkar for artiklane? Kunne ein framheve Tourist information på ein betre måte ved direkteval frå høgre- eller venstremargen?

Eg spør: Kan sjølve strukturen forbetrast utan den store omlegginga?

Angåande statistikkane så har eg her gått ut frå grunnlaget frå google analytics. Samla visningstal for "tourist information" er 50243 klikk i følge databasa på Hjørundfjordportalen. Dette er eit tal som oppdaterar seg for kvar einaste gong ein trykkjer på linken. Dette er tal heilt frå oppstarten av portalen, så her kan eg ikkje seie noko om kor mykje klikk det har vore i år.

Mange går nok rett på artiklane gjennom f.eks. google og andre søkemotorar og ikkje via den vante ruta med å trykkje på "Tourist information". Om Google Analytics har indeksert alle sidene og registrerar statistikken på dei er eg heller ikkje heilt 100% sikker på, men det gir oss iallefall ein liten peikepinn på kvar eventuelle "problemområde" ligg. Eg skal leggje ut ein tilsvarande artikkel til neste år så får vi sjå kvar landet ligg.

Eg føler behovet for å leggje til ei lita linje til artikkelen over:
"Med atterhald om feil i statistikkane".

Angåande strukturen på portalen så vil eg gjerne høyre fleire meiningar rundt dette då eg er litt samd med Per her. Kva stoff er vanskeleg å finne? Kva kan gjerast for å gjere det enklare? Har du døme på sider med bra struktur som vi kan hente inspirasjon frå?

Kva type innhald saknar vi på portalen? Kva burde vi verte flinkare på? etc. etc...

Er lista for å skrive på portalen for høg eller eventuelt er det for vanskeleg? ...eller forventar vi at portalen skal fungere som ei nettavis der journalistar står for innhaldet?

Grunntanken med portalen er at den skal være både for og av brukarane, men eg fryktar at "bygdedyret" gjer at få torer å stikke seg fram.

Vi må ikkje la bygdedyret få kvele portalen vår.

Vi amatørane kan meine så mangt, men vi er kanskje viktige for fagfolka dersom dei skal vere våre rådgivarar. Difor må vi prøve å samle synspunkta og på eit gitt tidspunkt kanskje spørje betrevitarane etter dei beste råda.

Med betrevitarar meiner eg den/dei som på nytt kan tenkje gjennom ei samla strukturell oppbygging ut frå definerte målsettingar for portalen - og der målgruppene er ein del av definisjonen.

Eg er glad for at det ikkje er så sterke røyster for å legge ned portalen og heller satse på face-book, instagram og andre såkalla sosiale media. Portalen er eit eineståande og varig lager av små og store viktige opplysningar om Hjørundfjorden som ein får fram med å bruke søkjefunksjonen.

Eg vil antyde at sjølvsagt skal innbyggarane i Hjørundfjorden ha dette som si næraste "lokalavis", utan å trakke "Møre-Nytt" på tåa. Dei er proffe og dyktige, men portalbrukarane kan legge lista lågare og halde fram med det kulturelle dugnadsarbeid. Når eg skriv innbyggarane, reknar eg og med dei som bur andre stader i verda, men som finn røtene sine i fleire ættledd tilbake til bygdene i fjorden vår.

Men kan vi finne vegar som knyter portalen til alle dei som kan tenkje seg vitje Hjørundfjorden?? Korleis skal ein nå turistar frå heile verda som ønskjer å finne nyttige opplysningar om Verdas Vakraste Fjord? Kan eit samarbeid med Turistkontoret i Ørsta og Destinasjon Ålesund og Sunnmøre vere ein formidlar til stoff om fjorden. Gjerne med engelsk, tysk og andre aktuelle språk?

Eg har ein tanke om at framtidige Hurtigrutepassasjerar kan logge seg inn på datamaskina si for å skaffe seg bakgrunnskunnskap eller logge seg inn på i-pad-en når skipet kjem inn fjorden. Der kan ein gi ei direkte guiding rett til brukaren.

Eg prøvde å få guidane på hurtigruta til å reklamere for orienteringane som ligg på portalen under Tourist information. Eg veit ikkje kor mange av guidane som formidla desse opplysningane om å logge inn på portalen. Men det skulle vere lettare å finne fram til portalen og slikt stoff!

Vi forvaltar den vakraste fjorden i verda. Straks ventar eg at "Verdas Vakraste Fjordbygd" skal presentere seg. Då må det bli lettare å finne fram enn det som ligg på portalen under Tourist information: "Vi vitjar vakre Urke".

Vi skal ikkje vere redde for å gøyme oss mellom alle dei høgstemte røystene rundt oss. Så i parantes:(Men eg vert likevel skuffa når eg les om Hjørundfjorden i praktboka "Sjå Søre Sunnmøre" (Iriss Forlag) som brukar mest ei halv side for å opplyse om kor trist fjorden er når det regnar og i skodde og resten til å utmåle om Kufjorden. Dette er Ålesundsk ukulturarroganse som bør få døy ut i fred.)

Statistikk kan brukast - og verte misbrukt. Eg ser at "Det gode liv på Sæbø" er på toppen og at "Dei beste skiforholda" har kome høgt opp. Men er dei av dei mest populære sakene for det? Tja, tek eg ikkje feil låg "Dei beste skiforholda" på portalen i påska og vart nok oppdatert av meg i alle høve ein gong. Dermed låg den på framsida lenge. Det same gjeld "Det gode liv på Sæbø". Også den saka vart oppdatert fleire gonger og låg dermed på framsida lenge og fekk mange treff. Den som oppdaterer får automatisk fleire treff. Men for all del - eg trur også at det var klokt å oppdatere desse sakene fordi dei hadde interesse i fleire dagar.
Men kvifor fekk "Den vakraste ferjekaia er opna" så mange treff? Denne saka vart ikkje oppdatert. Eg trur det må ha med denne facebook-greia å gjere. Kanskje låg der ein peikar på ei facebook-side til Statens Vegvesen? I det heile har facebook vorte viktig for å få fleire treff - trur eg, samstundes som det er facebook som er i ferd med å ta livet av portalen vår.
Og når t.d. nemnda for Hjørundfjorddagane vel å bruke facebook som primærkjelde for informasjon så er det skivebom - facebook har ingen sjanse til å nå ut til så mange som Hjørundfjordportalen gjer og det sjølv om det har blitt færre brukarar av Hjørundfjordportalen. Om ein vil nå ut til informasjon til folk flest, bruk portalen og legg evt. peikarar ut på facebook.

Ja, det har blitt færre brukarar av portalen. Det skjer kort og godt fordi det er færre som skriv her, eller så skriv nokre (Som underteikna) langt færre innlegg. Ikkje så mange går inn på portalen for å få vite nyhende lenger.

Men at "Toppturar i vinterfjell" skal få så mange treff er kort og godt utruleg. Ei av årsakene er nok at Iriss.no har ein peikar, i tillegg er alle toppturane samla på ei side. Som allereie nemnt; på denne måten vert det lett å finne fram. Men sida kunne vore betre med fleire oppdateringar. Og etter kvart vert det nok stilt høgare krav til fotokvalitet og tøffe skifoto. Personleg får eg så mange telefonar/e-postar i skisesongen at eg klart ser at vi burde ha ei side med daglege oppdateringar, men dette er tidkrevande å få til og det er nok reiselivsnæringa som må føle eit ansvar her. Og så ei lita bøn: Aldri har så mange gått til topps på ski, men diverre får vi ikkje nye skribentar sjølv om andre fell ifrå...

og vi er heldige som har tilgang til et slikt verktøy. Den er kjent og brukes av både lokale og andre.

Kombinasjonen Hjørundfjordportalen/FB er helt suveren. Skriv en artikkel på portalen der du informerer om aktiviteter og happenings, gode historier m.m. Legg ut en link til artikkelen på FB, be FB-venner dele lenken og du kan nå mange om artikkelen er interessant nok. På denne måten når du både de som bare bruker portalen og også de som bruker Facebook.

MEN: den som legger ut en nyhet/artikkel om kommende aktiviteter må bli flinkere til å fjerne artikkelen når aktiviteten er gjennomført, eller gjøre den om til en artikkel om hva som skjedde på f.eks. sykkelløpet til barneidretten eller rampemarsjen til trimgruppa. Uaktuelle saker gjør portalen uinteressant. Pr. i dag ligger vel to slike saker ute på portalen: julefesten på bedehuset og nyttårsfeiringen i fonnvernet. Vekk med dem!

Flere bør også benytte seg av aktivitetskalenderen på portalen. Er en aktivitet bestemt er det viktig å få den inn der så tidlig som mulig. Dette vil også redusere muligheten for kolliderende arrangement på Sæbø.

Om bygdedyret hindrer folk i å bruke portalen er det DET som bør kveles, ikke portalen.
Om noen legger ut saker for å fremheve seg selv, så er det som regel ingen andre som tar skade av det. Det meste av stoffet som legges ut blir offentliggjort i god mening, med et ønske om å dele informasjon og hendelser med andre.

Små ting (jeg synes det er en kjempesak) som at Hilde Sæbønes (m. fl.?)i går kveld var ute og merket Gunnarråsa med refleksbånd hadde fortjent en artikkel på portalen. Ørsta kommune har en helsekoordinator som skal fremme aktivitet blant folk. På Sæbø har vi ildsjeler som bruker fritiden sin til dette. Nå er det mulig å gå råsa i kveldsmørket om du har lykt/hodelykt. Ideen kom torsdag kveld, fredag kveld var det gjennomført.
Sånne saker er det viktig å få ut informasjon om.

Vi skal i all fall være klar over at Hjørundfjordportalen kan være et godt verktøy i arbeidet med å skape aktivitet, arbeidsplasser, og bovilje i Hjørundfjorden.

Artikkelfunksjonen var vel igrunnen ikkje meint for å annonsere aktivitetar på den måten det vert gjort av og til, men eg trur eg sjønar kvifor det vert gjort. Trur dette speilar seg i eit behov for å gjere enkelte aktivitetar meir synlege noko som er vanskeleg slik aktivitetskalenderen er i dag. Det ein kan gjere i slike tilfelle er å bruke den innebygde funksjonen for publiseringstidsrom. Om ein annonserar ein aktivitet som artikkel kan ein gå inn å leggje inn ein dato for når artikkelen skal verte avpublisert.

Eg syns ikkje vi skal gå til angrep mot slike innlegg, men heller veilede dei som legg dei ut til å bruke artikkelfunksjonane på ein tilfredsstillande måte.

Det er veldig viktig for oss å få vite kva som ikkje fungerar optimalt slik at vi kan gjere noko med det. Noko er vi klar over, men mykje ynskja funksjonalitet vert aldri gjennomført fordi vi rett og slett ikkje veit kva folk vil.

Angåande kombinasjonen FB/portalen Kari og Knut inne på kva som skjer for tida. Eg ser at trafikken frå sosiale media aukar samstundes som den jamne trafikken som har vore tidligare går litt ned. Besøk frå google-søk går faktisk litt opp. Dette er nok grunna portalen er spekka med mykje godt stoff som vert betre og betre indeksert av søkerobotane, og at fleire og fleire websider linkar direkte til portalen. Til fleire som linkar til portalen til meir respekt får ein i søkeresultata.

Eg vil gjerne ha litt synspunkt på artikkelfunksjonane frå dei som skriv mykje innlegg her på portalen. Kva svakheiter kan vi rette opp i for å gjere det lettare for folk å leggje ut innlegg?

Kva kan vi gjere for å auke bruken av portalen?

Til dokke som brukar portalen flittig; Eg er sikker på at dokke har synspunkt på korleis ein kan organisere artiklane betre. Kva kan gjerast for å gjere det enklare å finne interessant stoff?
- Fleire forslag til liknande artiklar når ein les ein artikkel?
- Omstrukturering av kategoriar?
- Andre forslag?

Vi vurderar å smelte saman nyhende og artikkel for å fjerne den tåkelagde grensa mellom desse innleggstypane. Er dette lurt?

Det har kome ein del ynskje om eigne sider for lag og foreningar, og det er no lagt inn nokre halv-løysningar. Kunne bruken av portalen aukast ved å leggje betre til rette for dette?

Kva skal til for å få med oss næringslivet? Er bedrifter villige til å betale for omtale på portalen?

Kva skal hovudsida på portalen innehalde?
- Rette oss mot lokalbefolkninga med ferske innlegg og oversikt over populære tidligare innlegg slik som no?

- Hovudtyngd mot tilreisande med informasjon til turistar om kva ein kan finne på i Hjørundfjorden og omegn?

- Andre forslag?

Eg syns såklart at portalen skal bestå, vekse og være eit friskt og fint samlingspunkt.
eg har eit par tips og synspunkt som ikkje er veldig gjennomtenkte og kanskje ikkje teknisk mulige.

1. Enig i at artikkel/nyheit kan slåast saman.

2. Ei betre og tydeligare løysing for aktivitetskalender som er enkel for brukarane

3. Webkamera. Alltid artig å kunne gå inn å sjå korleis det er akkurat no. Gjerne i sjøkanten så ein ser om det er flo, og under skodda. Fint å sjå om det er snø på toppane og.

4. Brukarar og bygdefolk kan vere flinke å bruke hashtags/emnemerke i sosiale media, så kan eit vindu på portalen speile innlegg der tagen #hjorundfjord er brukt? Går det an?

5. Hjørundfjorddagane bør ha all info på portalen, eller i det minste link til info på portalen. Ein idiot som meg som ikkje bur i bygda skjønar ikkje kvifor info om dagane ikkje ligg på portalen.

Eg føler meg trygg på at Tor Erik følgjer med kva som vert gjort i andre, tilsvarande portalar. Der kan det truleg hentast ein del tips.

Sjølv har eg sans for at ein kan slå saman nyhenda og artiklane til ei gruppe. Kanskje ein søkjefunksjon med t.d. 10-15 siste oppslaga kunne sortere ut uaktuelt stoff?

Så må ein finne ein god måte å slette forelda nyhende og uaktuelle artiklar. Den som legg inn må ha eit ansvar her. Arrangement må vi få bort straks stoffet er uaktuelt.

Så er eg overraska over at vi ikkje legg inn opplagt stoff som avisene dekkjer godt:

Hurtigrutevitjingane har vore "ikkjetema" på portalen. Kvifor?

E39-saka ser ut til å vere tabu-område. Kanskje finst her mange andre saker som ein ikkje tør å ta opp. Eg vi redde for stoff som ein eller fleire kan mislike?

Stoffsorteringa:

1. Linja med Lokalt, Natur, Tourist Information, Bygdene, Bygdeutvikling kan gå ut og leggast inn under sidefelta (viss dei framleis er aktuelle!)

2. Kunne høgremargen nyttast som service for oss faste brukarane av portalen med stoff som vedkjem den delen av lesarar/sjåarar? Tringruppa, kyrkja mm.

3. Kunne venstremargen signalisere at her er stoffet for andre enn dei faste brukarane, t.d. turistar, nysgjerrige etter stoff om Hjørundfjord.
Ein kan - viss ein finn den gode nøkkelen - ta betalt for annonseprega tilvisningar; t.d. overnattingsstader, arrangement ..

4. Dei tekniske greiene som søkjefelt etc. må framleis fungere godt. Det er og bra viss ein kan halde ein jamnt god teknisk tilstand slik at det er lett å legge inn stoff, utan masse plager som til tider endar med at ein må legge inn stoffet fleire gonger før det er på plass - eller gi opp.



EG HAR TRU PÅ AT PORTALEN BERRE VERT VIKTIGARE OG VIKTIGARE FOR HJØRUNDFJORD !

Eg vonar i alle høve at nemnda for Hjørundfjorddagane og andre som vil ha folk til arrangementa sine vel å bruke Hjørundfjordportalen som primær-informasjonskjelda, jfr. meiningsmålinga til venstre på framsida. Hugs på at alle kan gå inn på portalen.
Så eit par kommentarar til Per Urke sitt siste innlegg. Han skriv m.a. at Hurtigrutevitjingane har vore eit "ikkjetema" på portalen. Et nemner berre at eg sjølv m.a. har skrive tre innlegg om dette temaet og eg ser at eg har lagt litt flid i fotoa også.
Per Urke skriv også at det ser ut til at E-39 saka ser ut til å vere eit tabuområde. Om det er korrekt trur eg Per Urke må ta ein del av skulda sjølv - i sin eigen debatt har han t.d. lagt meiningar til folk som dei slett ikkje har. Då er det berre ein ting å gjere - halde seg langt unna slike debattar.

Då tenkjer eg at vi plasserar samanslåing av nyhende og artiklar høgt opp på lista så sant ingen har noko i mot det.

Angåande webkamera så er det berre å seie ifrå om nokon har eit aktivt eit så koblar eg portalen opp mot det snarast. Om melder seg frivillig til å setje opp eit slikt så hadde det vore heilt topp. Di fleire de betre :) Kunne godt tenkt meg å fått kobla portalen opp mot ein lokal vêrstasjon også. Kor tøft hadde det ikkje vore å presentert superlokale vêr-rapportar frå Hjørundfjorden?


Eg meinar også at Hjørundfjorddagane bør nytte portalen. Om det er trong om diverse tilpassingar så skal vi nok klare å løyse det i felleskap. Hadde vore fint om vi hadde fått dei inn i god tid før dagane går av stabelen.


Vi administratorar må nok ta litt av skulda for at det har vore ein del ukurante innlegg liggande etter "utløpsdato". Vi kan sjølvsagt gå inn å avpublisere dei. Dette må vi nok verte flinkare på.

Når det gjeld hurtigruta og dekninga av denne på portalen så vart eg faktisk overraska over at folket på Urke/Øye ikkje nytta portalen i det heile teke. Om ein ser på portalen så ser det nesten ut som om Hurtigruta aldri har sett snuten i fjorden vår. Møre-Nytt, Sunnmørsposten og tilogmed Hurtigruta sjølv ausa ut med godord om Hurtigruta og Hjørundfjorden. På portalen var det HEILT stilt... er det ingen som brukar portalen i Norangsfjorden?

Per Urke:
Du nemner noko om teknisk tilstand på innleggsfunksjonane. Fint om du kunne ha utbrodert litt om dette. Gjerne pr. epost.

Bør portalen vinklast mot turistar og tilreisande i fyrste rekkje, og heller late lokalbefolkninga klikke ein ekstra gong for å kome seg fram til det "vanlige" stoffet?

Tok eit raskt søk på portalen etter Hurtigruta, og det er nok rett som Knut her nemner... Han har faktisk skrive om henne. Beklagar Knut, det hadde eg gått glipp av.

Eg meiner likevel at dette stoffet helst skulle ha kome frå Norangsfjorden og i form av fleire gladsaker med jamne mellomrom. Møre-Nytt har til dømes 64 søkeresultat på "Hurtigruta"...

Betente nyhende trur eg mange kvir seg både ein og tre gongar før dei skriv om.

Eg har lese det du har skrive om hurtigruta og bygdefolket sin innsats! Skriv det på konto for gløymsla. Det er likevel eit faktum at vi ikkje har vore flinke til å lage stoff frå ekskursjonane og vandringa i bygda. Avisene var flinke! Mykje godt stoff for seinare, skulle eg tru?

Når det gjeld E39-saka, minnest eg at eg skreiv at bondalingane og folket på vestsida av fjorden var tause når det gjeld vegtrasevalet. Eg tilla dokke at de ikkje ville ta konflikta med oss som har jobba for ei vegline frå Kalvatn,via Bjørke, Viddal, Øyelandet, Sykkylven + Sykkylvsbrua.

Eg hadde ikkje rekna med at det skulle vere så farleg å meine at de hadde ei slik oppfatning. Eg fekk i alle fall vite den gongen at du skulle ha deg fråbedt at eg tilla deg slike meiningar! Den tolde eg godt!

Men dermed fekk ein heller ikkje til ein diskusjon om temaet vegval, men derimot at eg hadde såra bondalingane! (Dette er no mange år sidan og gløymt for lengst!)

Til Tor Erik:
Eg ser for meg at høgremargen kan reserverast for oss trufaste brukarane. Venstremargen kan ha gode oppslagsord om godt stoff for dei andre som opnar portalen for første gong og for dei som er sporadiske brukarar.

Teknisk: Eg har i perioder plagast med å legge inn stoff, andre tider fungerer det godt. Ivar Svein har anbefalt å rense koder (med penselen) og det har faktisk hjelpt!

Eg har oppretta eit innlegg i forumet der ein kan kome med med forslag, idéar og tankar. Det treng ikkje å være gjennomtenkt.

http://www.hjorundfjord.no/?komponent=forum&handling=les_emne&emne=403&side=1#innlegg_924